Borgarfjarðarkonur tóku vel á móti okkur á septemberfundinum. Sveitarstjórinn sýndi okkur þjónustuhús í smíðum, við fengum ljúffengan forrétt framreiddan við Hafnahólma og indælis mat á fundarstaðnum í  Fjarðarborg. Þar hlustuðum við á áhugavert erindi hjá Öldu Marín Kristinsdóttur um verkefni Brothættra byggða.  Við Héraðs- og Seyðisfjarðarkonur fengum að prófa nýklæddan veginn um Njarðvíkurskriður og eggjagrjótið í Vatnsskarðinu. Begga sýndi hæfni sína í að skipta um dekk í myrkri en Óla brunaði þetta fram og tilbaka á mótorhjólinu.

Á fundinum var lagt fram verkefnaplan fyrir veturinn.

Miðvikudaginn 29. maí síðastliðinn hittust systur á Kaffi Láru á Seyðisfirði á síðasta fundi vetrarins. Systur gæddu sér ýmist á rauðrófuborgara eða venjulegum hamborgara og fengu súkkulaðiköku í eftirrétt. Á fundinum sagði Rannveig Þórhallsdóttir frá rannsóknum sem hún hefur unnið að á fjallkonunni sem fannst við Vestdalsvatn á Vestdalsheiði árið 2004 og var það mjög áhugavert.

Hér má lesa MA ritgerð Rannveigar

Miðvikudaginn 8. maí sl. héldum við fundinn okkar á Reyðarfirði og buðum konum í Fjarðabyggð að sitja hann með okkur.  Stefnt er að stofnun nýs klúbbs í Fjarðabyggð og var þetta liður í kynningarstarfinu.

Okkur til mikillar ánægju mættu milli  15 og 20 konur, undirtektir voru góðar og áhuginn virtist mikill. 

Við höldum þessu starfi áfram og vonandi líður ekki á löngu þar til klúbburinn verður formlega stofnaður.

Á fundi Soroptimistaklúbbs Austurlands þann 03. apríl s.l. var Jóhanna I. Sigmarsdóttir gerð að heiðursfélaga klúbbsins. Jóhanna var aðalhvatamaður að stofnun klúbbsins á sínum tíma en hann var formlega stofnaður 6. september 2003.  Undirbúningur var búinn að eiga sér stað í langan tíma undir stjórn Jóhönnu og samkvæmt fundargerðum höfðu verið haldnir 14 fundir fyrir sjálfan stofnfundinn.

 Jóhanna var fyrsti formaðurinn og hefur síðan gegnt ótal störfum fyrir klúbbinn bæði í stjórn og öðrum embættum, einnig hefur hún setið í stjórn Soroptimistasambands Íslands. Með þessu vill Soroptimistaklúbbur Austurlands sýna henni smá þakklætisvott fyrir hennar góða starf fyrir klúbbinn.

Með Jóhönnu á myndinni eru Þorbjörg Garðarsdóttir formaður og Rannveig Árnadóttir.

Í gær, 25. nóvember 2018, efndum við í Soroptimistaklúbbi Austurlands til göngu gegn kynbundnu ofbeldi.  Gangan fór fram á Seyðisfirði og var gengið frá Bláu kirkjunni, (sem er lýst með appelsínugulum ljósum þessa 10 daga) og að Skaftfelli þar sem okkar beið kaka og heitir drykkir í boði Skaftfells og Fellabakarís.

Við höfðum einnig verið í Bónus og Nettó á laugardaginn, gefið fólki mandarínur og afhent dreifibréf.

Við söfnuðumst saman við kirkjuna, blésum upp blöðrur og kveiktum á kyndlum.  Þorbjörg formaður flutti ávarp sem lesa má hér og síðan lagði hópurinn af stað.  Okkur taldist til að nálægt 50 manns hefði tekið þátt í göngunni.

Veðrið var fallegt en frekar kalt svo gott var að fá heitt kakó eða kaffi þegar í hús var komið.

Á leiðinni til baka yfir Fjarðarheiðina skartaði Snæfellið svo appelsínugulu himinsjali - tók undir með málstaðnum, viljum við meina.

Hér má sjá fleiri myndir.

Föstudaginn 2. nóvember 2018 heimsóttu 3 systur úr Austurlandsklúbbi Kvennaathvarfið í Reykjavík og afhentu þeim styrk að upphæð 450.000 kr.  Stærsti hluti upphæðarinnar safnaðist á haustfundinum á Laugarbakka fyrstu helgina í október.

Vinningarnir voru allir gefnir af fyrirtækjum og einstaklingum á Austurlandi og kunnum við þeim bestu þakkir fyrir.