Hildur Jónsdóttir, verkefnastjóri Sigurhæða og verðandi forseti Soroptimistasambands Íslands, fór ásamt Hafdísi Karlsdóttur, forseta Evrópusambands Soroptimista á fund hjá kvennanefnd Sameinuðu Þjóðanna sem haldinn var 11. til 22. mars. Þemað var Hröðum árangri í baráttunni fyrir kynjajafnrétti og valdeflingu kvenna með því að ráðast gegn fátækt og styrkja stofnanir og fjármögnun þeirra með kynjasjónarmið að leiðarljósi.
Kvennanefndin  vinnur að framgangi markmiða um jafnrétti kynjanna og jafna stöðu þeirra, skrásetur raunveruleika kvenna um allan heim og mótar viðmið um fullt jafnrétti og valdeflingu kvenna. Árið 1996 var nefndinni enn fremur falið að vinna að því að samþætta kynja- og jafnréttissjónarmið inn í allar stefnur S.þ. og allar stofnanir þeirra. Jafnframt hefur hún forystu um að fylgjast með framgangi og innleiðingu Peking-áætlunarinnar svokölluðu frá 1995 S.þ. Hún stendur árlega fyrir tveggja vikna fundi í höfuðstöðvunum í New York, þar sem ýmsar stofnanir S.þ. eru með dagskrár og fulltrúar stjórnvalda, stofnana, frjálsra félagasamtaka og grasrótarhreyfinga eru kallaðir til leiks. Fundurinn er vettvangur fyrir aðildarríkin til að koma saman, hugsa í lausnum, deila reynslu og aðferðum við að auka jafnrétti og styrkja stöðu kvenna og stúlkna í heiminum. Fundurinn er sá fjölsóttasti sinnar tegundar í heiminum öllum. (mikið stytt útgáfa af grein Hildar í Fregnum, apríl 2024)

Sigurhæðir fluttu 2. september 2023 í Heiðmörk 1a, Selfossi, skammt frá fyrri heimkynnum. Nýja húsnæðið er rúmgott og bjart og rúmar mjög vel starfsemina. Nú geta allar meðferðarfreyjurnar fjórar verið með skjólstæðinga hjá sér samtímis, gott pláss er fyrir alla hópavinnu og sömuleiðis getur kyrrðarjógað farið fram í húsinu.
Við aðstandendur Sigurhæða horfum bjartsýnum augum til framtíðar og erum þakklátar fyrir þær frábæru móttökur sem Sigurhæðir hafa fengið allt frá upphafi, bæði meðal skjólstæðinga okkar svo og meðal þeirra sem hafa styrkt okkur gegnum tíðina.
Minna má á heimasíðu Sigurhæða: sigurhaedir.is, en þar má finna upplýsingar um starfsemina og einnig er þar krækja þar sem hægt er að panta viðtal og önnur krækja fyrir þau sem vilja styrkja Sigurhæðir eða gerast velunnarar þeirra.

Landssambandsfundurinn var haldinn að þessu sinni á Hótel Selfossi. Alls 219 systur úr öllum klúbbum landsins sátu fundinn. Suðurlandssystur buðu kvöldið áður til móttöku í Sumarliðabæ, sem er hestabúgarður í einkaeigu í Rangárvallasýslu. Hjónin sem hann reka sýndu í verki stuðning sinn við Sigurhæðir, verkefni Suðurlandssystra, með því að fella niður húsaleigu fyrir móttökuna. Í Sumarliðabæ buðu systur upp á ýmsar kræsingar og léttvín. Skemmtiatriðin voru tvíþætt, annars vegar riðu þeir Ólafur Ásgeirsson og sonur hans áreynslulaust um svæðið í höllinni á glæsilegum gæðingum. Hins vegar söng Herdís Rútsdóttir nokkur lög við undirspil Alexanders Freys Olgeirssonar. Óhætt er að segja að góð stemning hafi myndast og systur skemmt sér vel saman á glæsilegum hestabúgarði.

Þann 19. mars 2023 var haldin hátíð í tilefni þess að tvö ár voru liðin frá opnun Sigurhæða. Klúbbsystur fjölmenntu ásamt mökum í Risið þar sem afmælið var haldið hátíðlegt, og þangað mættu líka verkefnisstjórn Sigurhæða og bæjarstjórar Árborgar og Hveragerðis, þau Fjóla St. Kristinsdóttir og Geir Sveinsson. Einnig heiðraði Guðrún Hafsteinsdóttir, fyrsti þingmaður Suðurlandskjördæmis okkur með nærveru sinni ásamt systur sinni, Aldísi Hafsteinsdóttur, sveitarstjóra Bláskógabyggðar. Á hátíðinni var undirritaður samningur við Árborg um árlegan fastan styrk til næstu þriggja ára. Ragnhildur Gröndal söngkona söng nokkur ljúflingslög við gítarundirleik eiginmanns síns, Guðmundar Péturssonar. Léttar veitingar voru í boði og var það samdóma álit okkar klúbbsystra að vel hefði  tekist til við að fagna þessum tímamótum.

Þann 19. maí 2022 hélt Soroptimistaklúbbur Suðurlands velheppnað málþing um árangur Sigurhæða á fyrsta starfsári þeirra. Á málþinginu fluttu ávörp þau Eliza Reid, forsetafrú, og Guðmundur Ingi Guðbrandsson, félags- og vinnumarkaðsráðherra. Jóna Ingvarsdóttir, formaður klúbbsins, gerði grein fyrir klúbbnum og starfi hans, og Hafdís Karlsdóttir, verðandi forseti Evrópusambands Soroptimista, sagði frá samstöðu Soroptimista í hinum ýmsu verkefnum sem þær taka sér fyrir hendur. Meðal erinda má nefna erindi Hildar Jónsdóttur, verkefnastýru Sigurhæða, um velgengni verkefnisins, erindi Jóhönnu Kristínar Jónsdóttur, sálfræðings, um árangur af EMDR áfallameðferðinni, erindi Elísabetar Lorange um nálgun Sigurhæða svo og erindi Kristínar Önnu Hjálmarsdóttur, kynjafræðings, um ytra mat á undirbúningi og innleiðingu Sigurhæðaverkefnisins. Auk þeirra erinda sem sneru beint að Sigurhæðum flutti Þórður Kristinsson, jafnréttisfræðari, erindi um karlmennskuna, Mjöll Jónsdóttir, sálfræðingur hjá Heimilisfriði, flutti erindi um vinnu með gerendum og Þóra Björnsdóttir, verkefnisstjóri innlendra verkefna hjá Barnaheillum, erindi um forvarnarstarf gegn kynferðisofbeldi gagnvart börnum. Upptöku af málþinginu má finna á sigurhaedir.is.