Á síðasta starfsári í tengslum við átakið Roðagyllum heiminn tók klúbburinn okkar ásamt öðrum Soroptimstaklúbbum á Íslandi þátt í að styrkja Samtök um byggingu kvennaathvarfs. Við hátíðlega athöfn tóku Sigþrúður Guðmundsdóttir og Eygló Harðardóttir fulltrúar Samtaka um byggingu kvennaathvarfs við 250.000 króna styrk úr hendi Ölmu formanns og Þórdísar verkefnastjóra.  

Við sömu athöfn veitti Landssamband soroptimista samtökunum einnig veglegan styrk. Fjallað var um átakið og styrkveitingar soroptimista í blaðagrein sem hér má lesa.

Klúbburinn okkar tók áfram þátt í samstarfi við Guðrúnu Helgu Bjarnadóttur í soroptimistaklúbbi Árbæjar að styrkja valin verkefni í Sierra Leone. Við létum að þessu sinni fé rakna til þess að innrétta fæðingastofu sjúkrahúss í Freetown, en áður hafði klúbburnn lagt til fjármagn til að þjálfa starfsfólk á barnaspítalanum í Freetown.  Á myndinni sést hvar Guðrún Helga fyrir hönd okkar afhendir fyrri styrkinn. 

Klúbburinn er aðal styrktaraðili sundverkefnis á vegum Félagsmiðstöðvar Breiðholts, Sundfélagsins Ægis og Ölduselsskóla, þar sem konum af erlendum uppruna er boðið upp á að þiggja sundkennslu. Verkefnið var styrkt starfsárið 2019-2020 um samtals 100.000 krónur. Þetta var annað árið í röð sem við styrktum sundnámskeið fyrir konur af erlendum uppruna og gerðum þáttakendum kleift að taka þátt án endurgjalds. Verkefnið þótti takast afburða vel. Hér er linkur á frétt í Breiðholtsblaðinu en á bls. 9 er fjallað um verkefnið.

Fjáröflunarnefndin stendur í ströngu þessa dagana enda risa verkefni framundan þegar 16 daga átakið Roðagyllum heiminn hefst þann 25. nóvember og líkur á degi Soroptimista þann 10. desember.  Með átakinu vilja Soroptimistar alls staðar í heiminum efla vitundarvakningu gegn kynbundnu ofbeldi. Sameinuðu þjóðirnar, NGO og konur um víða veröld munu draga athygli að þessum mannréttindabrotum sem ofbeldi gegn konum og stúlkum er. 

Ágóði af sölunni mun renna til góða verka tengt átakinu Roðagyllum heiminn.